HANDAK JADI BIBINIAN (Serial Utuh Ujai)

Utuh Hirman ne begawi di batu bara, satiap kali bulik bagawi kalapahan wan kauyuhan. Napang mun pul 12 jam manyupir trak haja gawian. Bininya, si Aluh Karamunting bagana haja di rumah maurus gawian rumah tangga. Asa bahiri kalo Utuh Hirman ne, lalu badoa ae imbah sumbahyang tahajud malam puasaan.

“Ya Allah, aku tulak bagawi saban hari 12 jam tapi biniku bagana haja di rumah, aku handak inya tahu kayapa uyuhnya aku bagawi, mun kaitu ijinakan kami bahurp awak sahari haja, Amin.”

Napakah, ahirnya doa Utuh Hirman ne dikabulakan Tuhan. Antah malam itu kabulujuran lailatul kadar kah, pina takabulan hajat. Isuk harinya inya bangun sudah baubah jadi binian. Bangaran jadi binian, lalu timbul ae naluri bibiniannya. Basubuhan inya mamasak sarapan, mambanguni anak-anaknya, mamandiakan, manyuapi, wan maulahakan sasanguan gasan ka sakulahan, imbahtu maantar anak-anaknya ka sakulahan.

Imbah tu bulik ka rumah, manyimpunakan rumah, batatapas, wan ka warung. Kira-kira jam 10-an tulak ka bank manabung duit, imbahtu tulak pulang ka pasar batutukar gasan maisi kius di muka rumah. Imbah bulik manurunakan barang bilanjaan, kabalujuran rumah masuk ka gang, jadi paksa maangkut saurang. Jam 12-an tulak pulang ka PLN wan PDAM bayar tagihan listrik wan banyu. Imbah bulik ka rumah, takajut hari jam 1-an. Basiap-siap pulang bamasak, imbah tu maambili kakanakan ka sakulahan.

Imbah tuntung sunyaan, di rumah masih ada haja gawian. Mambarsihi dapur wan mambasuh piring. Maangkat jamuran, imbah tu manyatrika. Jam 4-an, bangunan kakanakan guring, ada nang batakun PR ada nang minta bukakan TV. Pukuknya macam-macam tu pang nang digawi. Jam 5, basiap bamasak malam, imbahtu mamandii kakanakan.

Sampai ajan magrib, datang nang bini datang bagawi. Malamnya, mangguringakan anak. Kabalujuran nang bini handak bakikukan, tapaksa malayani kada kawa manulak. Pukuknya uyuh kada katulungan.

Tangah malam bangun sumbahyang tahajud. Badoa pulang.
“Ya Allah, cukup sahari haja aku jadi bibinian. Jara saumuran mun kaeni uyuhnya. Mun kaitu, hurupakan awak kami mun sudah bangun kena.”

Parak subuh waktu Utuh ne guring, inya bamimpi doanya mandapat jawapan. Inya didatangi urang tuha babaju putih nang manjulung kartas nang batulisan:

“Rupanya ikam sudah mendapati satu pelajaran, Aku akan sanang gasan mehurupi awak buhanmu kaya asal, cuma sabuting, ikam harus manunggu sampai 9 bulan, karna malam tadi ikam sudah hamil.”

Wkakakakakak, barilaan.